Dala barak iha sosiadade komesa husi uma kain no lisan ida-ida konsidera makaas liu maka aman, tanba nee tau aman nia pojisaun hanesan xefi familia no hatur katak aman nia hanoin no desijaun sira mak hetan konsiderasaun liu tanba aman mak buka osan liu husi halao serbisu profesional sira nebe valoriza ho osan kada fulan liu husi salariu no vensimentu sira. Baze ba nee mak dala barak inan nia responsabilidade iha uma laran ladun hetan konsiderasaun iha sosiadade laran tanba inan nia serbisu iha uma laran la iha valor ekonomia no semak bele valoriza inan nia serbisu iha uma laran kada fulan? Se aman iha uma laran ita bolu hanesan xefi husi familia no oinsa ita konsidera inan nia papel iha iha uma laran?
Inan hanesan centru husi familia ida no sei la dubida konaba inan nia funsaun iha uma laran tanba inan mak halo familia bele moris hamutuk, haree no kuidadu, fo apoiu emasionalmente bainhira deit pesija. Iha moris kultura barak maka hadomi no hamtauk inan tanba ninia dedikasaun tomak nebe la sura kolen ba nia familia.
Inan responsabiliza ba jestaun iha uma kain ida no certeja katak buat hotu lao ho diak tuir standar moris nebe los no diak iha sosiadade. Komesa husi tein, hamos uma laran, fase ropa no halo jestaun ba osan nebe aman hanesan xefi da familia buka hodi sustenta moris uma kain ida, ho nunee maka membru familia hotu hetan moris nebe kontenti iha uma laran. Papel inan nian iha parte barak no iha mos ejijensia. Nia sai ema primeiru nebe hader uluk iha dadersan no ema ikus nebe ba toba iha tempu kalan, hodi asegura katak nesesidade membru familia hotu realiza ona.
Iha sorin seluk laos hare deit serbisu uma laran nian, inan mos sai hanesan centru ba emosional familia nian. Inan mos kria emvairomentu nebe seguru no apoiu ba oan sira bele moris ho hakmatek. Inan bele sai hanesan fatin ba fahe hanoin, esperiensia, no problema nebe membru familia hasoru, selebra ninia oan sira nia alkansamentu no anima membru familia sira iha tempu tristi no hasoru presaun moris nebe makaas. Inan nia domin la iha limitasaun, no inan nia prezensa dala barak hamosu diferente iha mundu.
Papel Inan nia sai hanesan ezemplu no mestra nebe diak ba oan sira, kuda valores moris no prinsipiu moris nebe importante hodi sai mata dalan ba oan sira nia moris tomak. Inan mak hanorin oan sira oinsa moris hanesan membru sosiadade nebe kumpri ba lei no prosedimentu sira hotu, laran diak, emapatiku, no iha responsabilidade iha nia hanoin, kolia, hahalok no asaun sira hotu iha sosiadade nia leet,.
Iha uma kain ida, domin no apoiu inan nian halo membru familia sira bele moris hamutuk nudar familia ida, inan mos hakiak sentimentu unidade no kohesaun iha familia uma kain ida nia laran, kria fatin nebe seguru no komfortabel ba membru famila hotu. Inan nia prezensa ajuda kria memoria no tradisaun nebe folin boot nebe hsuik hela sai hanesan liman rohan ba jerasaun dalas ba dalas.
Konklui katak, inan mak sai hanesan centru lolos ba uma kain familia ida. Inan hanesan mahein, mestra no kolega. Nia kaer papel prinsipal iha uma laran hodi kria uma kain nebe moris iha paz no dame nia laran nebe nakonu ho domin, respeitu malu, kompriende malu. Tanba nee ita hotu tengki agradese ba inan nia serbisu makaas hodi kuidadu ita no sai centru ba familia nebe forte no suportivu ba familia tomak.
No comments:
Post a Comment