OINSA MORIS SEGURU HANESAN SIDADAUN?

Husi: Vital N. Barreto

Introdusaun

    Iha rai ida nee inan hahoris ita hanesan Timor oan, iha rai ida nee aman haboot ita ho nia kosar ben, iha rai ida nee ita nia bei ala sira luta buka liberdade hodi sai nain lolos ba riku soin tomak no too jerasaun ita nian hetan ukun aan, no iha ukun aan ida nee ita iha lideransa nebe lidera ita hanesan nasaun, maibe iha ukun aan ida nee Timor oan komesa moris iha intoleransia nia laran, timor oan moris nakonu ho diskonfia malu, hahuu moris disintegrasaun nia laran mosu grupu oi-oin haketak malu, hafuu malu, ataka malu no hana malu hanesan inimigu, iha bairo-bairo grupu sira halibur malu no faan no sosa rai la tuir lei no prosedimentu, okupa, hadau rai no hela ilegalmente hodi fo ameasa ba ema seluk nebe la kor ida ho sira nia grupu. Ema labele Lao tama sai bairo iha tempu kalan ka loron tanba ita hanesan lao iha inimigu nia leet ema hateke tuir ho diskumfia hanesan ema fuik ho leet. Moris vizinhu la hakmatek tanba uma kain ida sai ameasa ba uma kain seluk tanba nee ema halo uma diak sempre haleu ho moru aas too ikus bee foer sai fatin la iha no dalan ema atu liu mos la iha tanba moru taka metin . Natureza mos fo sinal no ameasa boot tanba ema ninia hahalok, iha tempu bailoro rai rahun sae no ema moras ISPA aumenta, iha tempu udan ema moras denge nakonu iha ospital, iha Dili laran be tama nakonu iha populasaun nia uma, tanba soe foer arbiru, estrada monu maske foin halo hotu tanba la iha kualidade, anin sobu uma iha fatin-fatin tanba ai horis tesi arbiru. Iha sorin seluk lideransa nebe povu tau fiar hodi jere povu nia moris diskunfia malu uza media komunikasaun insulta malu hatun malu no sura kolen. Se nunee SEI SEGURU KA MORIS IDA NEE ?

    Nudar Timor oan ita persija haree fila ba kotuk, objetivu prinsipal husi luta atu ukun aan maka kore aan husi ema seluk no sai husi situasaun tauk nia laran hodi ita rasik bele dezemvolve moris nebe diak liu tuir Timor oan nia hakarak, maibe tanba sa tama ukun aan tinan sanulu resin hitu ona ita seidauk bele simu malu lolos? Tanba sa tengki uza diferensia iha pasadu hodi julga no haketak malu? Atu bele rezolve problema nee hotu maka liu dalan ida deit hametin SIDADANIA. Iha lian makasae sidadania (Si dada nia) katak hau nia avo nian, nee hatudu katak sasan ka buat ruma nebe liman rohan husi avo nebe rai hela ba nia zerasaun entaun tenki rai didiak ho kuidadu atu nunee bele ezisti nafatin husi jerasaun ba jerasaun. Signifikasaun ida nee kona malu ho liafuan portugues Cidadania nebe uza hodi indika membru ba grupu ka nasaun. Ho nunee ema timor oan hotu tengki tau nia aan hanesan sidadaun lolos hodi fo kontribusan ba prosesu dezemvolvimentu tomak. Iha pilares neen husi karater sidadania, ida: Fiar ka iha lian inglesh Trustworthiness ka iha lian portugues fidedignidade katak sidadaun hotu tengki moris iha onestu, halo tuir lolos liafuan rasik, barani halo tuir lia los, la bosok nia aan, familia no nasaun hodi harahun ninia dignidade nudar ema Timor. Rua Respeitu iha lian inglesh Respect, iha serbisu publiku tengki tarata maluk timor oan hotu ho respeitu, moris iha sosiadade tengki iha toleransia no simu ema seluk nia ezistensia nebe deferente. Uza media komunikasaun hodi hatoo mesajen ka informasaun ho liafuan nebe diak ho nunee ita konsidera ema seluk hanesan ita nia aan. Moris sosiadade ohin loron nakonu ho moras sosial nebe hadaet husi jerasaun ba jerasaun tanba uza liafuan kroat iha publiku hanesan babain tanba nee bandu boot ba membru instituisaun sira nebe kaer knar atu halo transformasaun povu nia morishodi nunee sira bele sai ezemplu. Tolu: Responsabilidade ka iha lian inglesh Responsability, halo saida maka ita tengki halo hanesan ema Timor oan maske iha sosiadade ita nia knaar ka funsaun nee kiik tebes, tanba liu husi dalan ida nee sei fo kontribusaun nebe boot ba prosesu dezemvolvimentu iha ita nia rain hodi nunee bele sai mos ezemplu ba maluk seluk nebe moris hamutuk iha aldeia ka suku. Haat: Justu ka iha lian inglesh Fairness, moris iha sosiadade lolos nee regulamentu no prosedimentu hotu sai hanesan mata dalan labele sai fali bareira ka naha todan ida, tanba liu husi regularizasaun ema hotu bele hetan oportunidade hanesan hodi bele halao ninia moris iha vida lor-loron. Rona ema seluk nia idea tanba nee tengki iha hanoin nebe nakloke hodi simu kritika nebe konstrutivu, labele uza ema seluk nia frakeza hodi kumpri interese pribadu. Liu dalan justu maka ema timor oan hotu sei la ignora malu hanesan sidadaun. Lima: Fo importansia ba ema seluk ka iha lian inglesh Caring iha realidade moris agora dadaun ema barak komesa lakon ona sentimentu nudar maluk Timor tanba haree liu ba grupu, ras no suku ida nee akontese iha moris lor-loron no mos iha instituisaun publiku nebe halao atendementu ba publiku se mak kuinese no iha ligasaun familia sempre hetan tratamentu abnormal. Tanba nee halo diak ba malu sai hanesan dalan ida hodi bele lao hamutuk nudar sosiadade atu bele too lais iha objetivu moris diak. Neen: Sidadania ka iha lian inglesh Citizenship, kria ambiente nebe diak no saudavel iha sosiadade laran no iha nebe deit sidadaun ida hela, liu husi dalan involve aan iha moris nudar sidadaun ida no lao tuir regulamentu no prosedimentu hotu, respeitu ba nai ulun sira no prontu serbisu voluntariu wainhira persija. Atu ema timor oan hotu la senti ameasadu iha nia moris lor-loron persija tebes ema ida-ida sai sidadaun nebe ho karater nen temi ona nee. Ema Timor oan hotu moris mai iha kultura nebe kesi no sai hanesan mata dalan hodi lao tuir maske la hakerek hanesan lei formal sira, maibe fasil los atu halo tuir no tauk atu kontra tanba ninia konsekuensia kona kedan atu iha tempu lais ka kleur tanba nee lei kultura metin no kuida nafatin husi jerasaun dalas ba dalas. Prosesu dezemvolvimentu lao lais liu wainhira ema timor oan hotu halao nia funsaun no knaar tuir regulamentu no prosedimentu hotu. Hodi nunee labele mosu traisaun ba ita nia aan rasik nudar sidadaun ida. Moris tuir prinsipiu sidadania la todan kuandu sidadaun ida la sai atan ba interese no arogansia pribadu no grupu. Partisipasaun timor oan hotu iha prosesu dezemvolvimentu tengki livre husi interese no kanten sira tanba kreatividade inovasaun tengki livre husi interese grupu no arogansia pribadu se lae kreatividade no inovasaun la dura no la benefisiu ba tempu naruk. 

Konkluzaun

    Aprende no moris tuir sidadania hahuu husi familia uma laran, iha nee inan aman kaer papel importante hodi hanorin oan sira oinsa moris iha respeitu ema seluk ninia prezensa, hanorin oan sira oinsa maka toman responsabiliza ninia hanoin, liafuan no hahalok hodi nunee wainhira boot ona fo kontribusaun nebe pozitivu ba prosesu harii no hametin dezemvolvimentu sosiadade ida nebe diak liu tuir ema timor oan hotu nia mehi.

Rekomendasaun

    Ikus liu atu moris seguru hanesan sidadaun iha nasaun ida nee maka ema ida-ida tengki konsiente no labele tau aan hanesan bainaka tanba nee hanoin, lia fuan, hahalok no attitude tomak hanesan ema Timor oan no tau iha ida ida nia fuan ho laran katak rai, nasaun no povu ida nee hau nian tanba nee hau tengki kuidadu no dezemvolve diak liu ba iha futuru.